Откриени цените на iPhone 18 Pro и iPhone Ultra – ќе бидат уште поскапи!

Цените за iPhone 18 Pro, Pro Max и преклопниот iPhone Ultra протекоа преку веб-страницата на Vodafone во пресрет на официјалната презентација на Apple

По стапувањето на Џон Тернус на функцијата генерален директор на Apple, големо внимание привлекува претстојниот настан на компанијата, закажан за среда, 9 септември. На него се очекува премиерата наiPhone 18 Pro и iPhone 18 Pro Max моделите, како и на првиот преклопен смартфон на компанијата, кој засега го носи работното име iPhone Ultra.

Нарачките, според информациите од синџирот на снабдување, би требало да започнат два дена по презентацијата, но податоците кои случајно биле објавени на официјалната веб-страница на Vodafone Egypt укажуваат на значително поскапување на целата серија.

Цената на iPhone Ultra највисока во Европа

Првиот преклоплив уред на Apple, со очекуван почетен капацитет од 256 GB, бил забележан на веб-страницата на египетскиот Vodafone по цена од 155.750 египетски фунти. Во споредба со минатогодишниот iPhone 17 Pro Max, тоа претставува зголемување на цената од околу 65 проценти.

Доколку овој процент се примени на досегашните глобални цени, се очекува почетната цена на iPhone Ultra на американскиот пазар да изнесува околу 2.000 долари, додека на европскиот пазар би можела да достигне 2.400 евра. Слично поскапување се очекува и во Австралија. Таму за верзиите со 256 GB, 512 GB и 1 TB се предвидуваат цени од 3.700, 4.200 и 4.700 австралиски долари.

Неофицијалните податоци укажуваат и на поскапување на стандардната Pro линија од околу 10 до 11 проценти. Врз основа на цените забележани на веб-страницата на египетскиот оператор, се очекува почетната цена на iPhone 18 Pro да изнесува околу 1.200 долари. За поголемиот iPhone 18 Pro Max се проценува почетна цена од околу 1.320 долари. Во нашиот регион, односно на европскиот пазар, цената би можела да биде близу 1.600 евра.

iPhone 18 Pro и Pro Max поскапуваат поради неколку причини

Главната причина за растот на цените, според аналитичката компанија TrendForce, е тоа што трошоците за производство на компонентите и материјалите за iPhone 18 Pro се зголемиле за дури 40 проценти во однос на претходната генерација.

До зголемување на производните трошоци доаѓа пред сè поради новата мемориска архитектура и вградувањето на понапредни компоненти. Официјалните детали, целосните спецификации и конечните цени по региони ќе бидат потврдени за време на презентацијата на 9 септември, пишува GSMArena.